t Evengelie volgens Lucas 22
01Nou was t Pesach op handen, zo haitte t feest van Broden-zunder-gèst.
02Opperpriesters en schriftgeleerden wazzen op zuik hou of ze hom van kaant moaken konden. Ze wazzen ja baang veur t volk.
03Dou kreeg Soatan Judas, dij Iskariot nuimd wer, ain van de twaalm, in zien macht.
04Hai ging hèn en pruit mit opperpriesters en bevelhebbers hou of e hom aan heur oetlevern zol.
05Dat ston heur wel aan. En ze stemden der in tou dat ze hom geld geven zollen.
06Doar ging hai mit akkoord en hai zöchte noar n goie gelegenhaid hom aan heur oet te levern boeten t volk om.
07Dou dag kwam van Broden-zunder-gèst, dat t pesachlaam ovverd worden mos,
08stuurde hai Petrus en Johannes der op oet en druig heur op: "Goa hèn en moak veur ons t pesachmoal kloar, dat we t eten kinnen."
09Ze zeden tegen hom: "Woar wol ie dat we t kloarmoaken?"
10 Hai zee tegen heur: "Heur es! As ie stad ingoan, zel n man joe in muit kommen dij n kroek mit wotter dragt. Goa mit hom tou t hoes in doar hai ingaait.
11 Doar mout ie tegen aigender van dat hoes zeggen: 'Meester let joe vroagen: woar is dij zoal doar ik mit mien leerlingen t pesachmoal holden kin?'
12 Hai zel joe boven n grode, bemeubelde zoal aanwiezen. Moak t doar kloar."
13 Ze gingen vot en vonden t net zo as hai tegen heur zegd haar. En ze muiken t pesachmoal kloar.
14 Dou tied ter heer was, ging e aan toavel mit zien apostels.
15 Hai zee tegen heur: "Wat heb ik doar noar oetkeken dat ik dit pesachmoal mit joe eten zol veurdat ik lieden mout!
16 Dit wil ik joe zeggen: ik zel t zekerwoar nait weer eten, veur dat t vervuld is in God zien riek."
17 Dou pakte hai n beker aan, daankte God en zee: "Neem dij beker en dail hom mitnkander.
18 Ik zeg joe: van nou òf aan drink ik nait meer van wat of wienstòk geft. Nait eerder as dat God zien riek kommen is."
19 Dou nam hai n brood, daankte God, brook t, gaf heur t en zee: "Dit is mien liggoam dat veur joe geven wordt. Dou dit tou n gedachtenis aan mie!"
20 Zo nam e ook beker noa t eten, doar e van zee: "Dizze beker is t nije verbond in mien bloud, dat veur joe vergoten wordt.
21 Mor denk ter om! Haand van mien verroader ligt mit mienent op dizze toavel.
22 Menskenzeun mout ja t pad goan dat God hom toubedocht het. Mor o wai dij man, deur wèl of e overleverd wordt!"
23 Dou begunden ze onder nkander zok òf te vroagen wèl of van heur dat wel wezen zol dij dat in t zin haar.
24 Ze kregen ook woorden over vroag wèl of van heur as grootste gelden zol.
25 Hai zee tegen heur: "Keunenks heersen over heur volken en wèl of doar de macht hebben, loaten zok weldounders nuimen.
26 Mor zo mag t bie joe nait wezen! Nee, belangriekste maank joe mout zok gedroagen as minste, en dij laaidt as ain dij daint.
27 Wèl is meer: dij aanligt of dij bedaint? Dij aanligt toch zeker? Nou den! Ik bin maank joe as ain dij bedaint.
28 Ie binnen t dij mie aalweg traauw bleven binnen dou mie t stoer moakt wer.
29 Ik vermoak joe t keunenkschop, net zo as mien Voader dat mie vermoakt het.
30 Dat ie zellen in mien keunenkriek aan mien toavel eten en drinken, op tronen zitten en rechtspreken over ale twaalf stammen van Israël.
31 Simon, Simon! Soatan het ter bot op aanstoan joe te schonen as waait.
32 Mor ik heb veur die beden dat dien geleuf nait beswieken zol. Astoe tou inkeer kommen bist, bemoudeg den dommit mien bruiers."
33 Hai zee tegen hom: "Heer, mit joe bin k ter kloar veur alderdeegs gevangenis en dood in te goan!"
34 Mor hai zee: "Ik zeg die Petrus, hoan zel vandoag nait kraaien veur dastoe drijmoal ontstreden hest dastoe mie kenst."
35 Hai zee tegen heur: "Dou ik joe op pad stuurde zunder pong of mat of schounen, heb ie dou woaraarns verlet om had?" Ze zeden: "Naargens om!"
36 Hai zee tegen heur: "Mor nou wordt t aans! Wèl of n pong het, zel dij mitnemen, en ook zien mat. En wèl of gainent het, zel zien mantel verkopen en n sweerd aanschavven.
37 Ik zeg joe, ook dit schriftwoord mout aan mie vervuld worden: 'Hai is tou misdoadegers rekend.' Wat over mie schreven is, doar gaait t nou op aan."
38 Ze zeden: "Heer, kiek, hier binnen twij sweerden!" Hai zee tegen heur: "Dat is genogt!"
39 Dou vertrok e en ging, zo as e wènd was, noar Olievenbaarg tou. Zien leerlingen gingen ook mit.
40 Dou e op dij stee aankommen was, zee e tegen heur: "Beed, dat ie nait in verlaaiden kommen!"
41 En hai ging n èndje vot, zowat zo wied as je mit n stain smieten kinnen, vuil op knijen en beedde:
42 "Voader, as dat joen wil is, loat den dizze beker aan mie verbie goan. Mor nait mien wil, joenent mout gebeuren."
43 Dou zag e n engel oet hemel dij hom kracht gaf.
44 En hai wer doodsbenaauwd en beedde aal vureger. Zien swait drupte as blouddruppen op grond.
45 Noa t beden kwam e in t èn en ging noar zien leerlingen tou. Hai zag dat ze van verdrait in sloap valen wazzen.
46 Hai zee tegen heur: "Hou kin ie nou toch sloapen! Kom in t èn, en beed dat ie nait in verlaaiden kommen."
47 Hai was nog nait oetsproken of der kwam n koppel volk aan. Man dij Judas haitte, ain van de twaalm, laip veurop. Hai kwam op Jezus òf om hom n doetje te geven.
48 Jezus zee tegen hom: "Judas, verradst doe Menskenzeun mit n doetje?"
49 Dou leerlingen dij bie hom wazzen in de goaten kregen, woar of t op aan ging, zeden ze: "Heer, zel wie mit t sweerd ter op inhaauwen?"
50 Ain van heur ruik hogepriester zien knecht en sluig hom t rechteroor òf.
51 Mor Jezus zee: "Zo is t genogt!" Hai kwam t oor aan en muik t beter.
52 Jezus zee tegen opperpriesters en ofsieren van tempelwacht en oldsten dij op hom ofkommen wazzen: "Net of ik n bandiet bin, zo bin ie der op oettrokken mit sweerden en knuppels!
53 Dou ik overdag bie joe in tempel was, heb ie gain haand noar mie oetstoken. Mor dit is joen kaans nou t duustern boas is!"
54 Dou ze hom oppakt haren, nammen ze hom mit noar hogepriester zien hoes tou. n Èndje achter heur aan laip Petrus mit.
55 Dou ze op binnenploats n vuur aanstoken haren en bie nkander zatten, ging Petrus der maank zitten.
56 n Maaid zag hom in vuurschien. Ze keek hom es goud aan en zee:
57 "Dizzent was ook bie hom!" Mor hai ontstree dat en zee: "Nee wicht! Ik ken hom nait!"
58 Even loater zag n aander hom en zee: "Ie heuren ook bie dij lu!" Mor Petrus zee: "Nee man! Ikke nait hur!"
59 Zowat n uur loater verzekerde n aander: "Joa hur! Dij was ook bie hom! Hai komt ook ja oet Galilea!"
60 Mor Petrus zee: "Man! k Begriep nait wat of ie mainen!" Nait meer as dat e dat zegd haar, kraaide n hoan.
61 De Heer draaide zok om en keek Petrus aan. Dou kwam t Petrus in t zin wat of de Heer tegen hom zegd haar: "Veurdat hoan vandoag kraait, zelstoe drijmoal beweren dastoe mie nait kenst!"
62 En hai ging noar boeten tou en begunde aldernoarst te reren.
63 Manlu dij Jezus vasthuilen, stoken hom gek aan en sluigen hom.
64 Ze deden hom n blinddouk veur en zeden: "Zeg es wèl of joe sloagen het! Ie binnen toch profeet?"
65 Ze deden nog meer lasterlieke dingen mit hom.
66 Dou t licht worden was, kwam road van oldsten van t volk, opperpriesters en schriftgeleerden, bie nkander. Ze luiten hom veurbrengen in heur vergoadern.
67 Ze zeden: "As ie de Christus binnen, zeg ons dat den!" Hai zee tegen heur: "Of zee ik joe t ook, ie zollen t toch nait leuven.
68 En of zol ik joe wat vroagen, ie zollen toch gain antwoord geven.
69 Van nou òf aan zel Menskenzeun zitten aan rechterhaand van aalmachtege God."
70 Ze zeden aalmoal: "Bin ie God zien Zeun den?" Hai zee tegen heur: "Dat heb ie goud! Ik bin t!"
71 Ze zeden: "Woar heb wie nog getugen veur neudeg? Wie hebben t ja zulm oet zien aigen mond heurd!"
|
